青心直說：人人都為數字而活

[size=5]因為銀行存款利息超低，資金索性玩尋寶，缸中唔少人思維「大挪移」，紛紛變身好「息」之徒，人人為數字而活；投資者越嚟越 mean，派少個崩都又話要斬要殺，其實買得股票信佢張公仔紙，就已經冒險，所以炒得股票嘅人從來好少貪息，費事等了又等，時代唔同，玩法不一樣， 5蚊嘅滙豐控股（ 005）已經唔存在喇！
除非好似東方海外（ 316）或數碼通電訊（ 315）呢類控股股東揸住大大份，為咗益自己友順便分埋畀小股東，否則上市公司根本無必要扮公用股派高息益街坊，最絕嘅好似中國太平（ 966）咁，話埋畀你知唔派息其實只係為你好，因為公司留子彈發展，華潤創業（ 291）派唔足又係因為要預留彈藥搞併購，將來有成果，反映於股價升幅之上當然更和味，唔少股東聽完古仔再俾大行報告吹一吹，確信唔派甚至少派只係為股東好，心甘命抵變相加注。


毅力手損腳爛
或者好似利豐（ 494）咁， 3年又 3年， 08年訂下目標 200億美元營業額，核心經營溢利達 10億美元，結果業績差強人意，兩個指標都只有 7成達標率，卻與此同時急不及待，再訂多一個 3年目標， 2013年盈利 15億美元，似乎佢哋對美國經濟復蘇非常樂觀，反映公司真係好有鬥心，非常進取，只是我又真係未見過撐竿跳嘅運動員，在未跨越一個制高點之前，會突破將目標再定高啲，可以預期，利豐在可見將來肯定會更加勤力透過併購壯大務求追近甚至穿越數字指標。
最令人不安者，係佢哋美國嘅合作夥伴沃爾瑪業績已連續三季不達標，見識過沃爾瑪經營手法嘅朋友，都知道對方最擅長揸乾供應商，想當年，毅力工業（ 332）就係因為接咗沃爾瑪好大張 DVD機定單，而在廣東清遠開咗幾十條新生產線服侍沃爾瑪，結果對方睇死佢封死自己後路，實行鍊佢價，搞到毅力手損腳爛，最後傷得最重嘅當然又係股東。
胡孟青
[/size]